Aizawl a Special Court (Prevention of Corruption) chuan dik lo taka mipui sum hmanga puh Chakma Autonomous District Council (CADC) a chairman hlui leh a fapa bakah deputy chairman hlui te chu thiamloh chantirin, kum 4 Jail tang tur leh cheng nuai 3 theuh chawi turin a hrem.
Special judge Dr. HTC Lalrinchhana chuan CADC chairman hlui Kali Kumar Tongchangya, a fapa Julius Tongchangya leh deputy chairman hlui Purna Muni Chakma te hi Zirtawpni khan eiruk thubuai-ah thiam loh a lo chantir tawh a. Vawiina hremna tihchhuah ah cheng nuai 3 chawi tur leh kum 4 chhung Jail tang turin a hrem a, pawisa chawi tur hi an pe theilo anih chuan thla 9 dang an tan belh dawn a, vawiinah Jail lama hruai nghal an ni.
Kali Kumar Tongchangya hi CADC chairman a nih lai a dan kalha a fapa Julius Tongchangya hna a thun bakah a hlawkna tura thil dik lo taka ti a puh a ni a. Heta hmanraw tangkai tak Purna Muni Chakma leh dik lo taka mipui sum ama mimal hlawkna atana hmangtu Julius Tongchangya te chu court hian thiam loh a chantir a ni.
