Vawiin chawhma khan Pu Lalnghinglova Hmar, Minister of State, Sports & Youth Services Department leh Pu Sandip Pradhan, Director General, Sports Authority of India (SAI) te chu New Delhi-a SAI Headquarters-ah an inkawm a, Aizawla SAI Training Centre (STC) ah sports discipline tam zawk dah dan tur an sawidun. Sports & Youth Services Minister Pu Lalnghinglova Hmar chuan India-in kum 2036 Olympic Games thlen a tumah Mizoram atangin infiammi tam thei ang ber tel an duh tih a sawi a. Hemi atana inbuatsaihna pakhat atan STC, Aizawl-ah Mizote thatna leh Olympic Games-a tel beisei theihna tur chi sports discipline dah belh a pawimawh thu leh hmalak dan turte SAI Director General nen an sawidun a ni.
STC, Aizawl-ah hian sports discipline pali – boxing, judo, taekwondo, weightlifting-ahte training kalpui mek a ni. Pu Lalnghinglova Hmar chuan Olympic 2036 vision denchhenin Mizoram khua zawng zawng hrutchhuak tur sports coaching lian tham kalpui tum a nih thu a sawi a. Hei hi SAI Director General pawhin a lo phurpui hle a, coaching pekna tur sports discipline thlanchhuah chu uluk taka kalpui a ngaih thu leh coach-te chu a tul ang zela training pe turin an inhuam thu Sports Minister chu a lo hrilh nghe nghe a ni.
Hemi chungchanga thawhho zel dan tur chiang zawka sawidun leh thuai turin an inthlah a ni. Minister hi Mizoram Sawrkar atangin Pu John Tanpuia, Joint Secretary, Sports & Youth Services Department leh Pu Henry C. Lalrawnkima, Secretary, Mizoram State Sports Council te’n an tawiawm a ni.
