Vawiin chawhnu khan Mount Carmel School, Aizawl chuan High School Leaving Certificate leh Higher Secondary School Leaving Certificate 2025 Toppers-te leh an school chhuak eizawnna lama hlawhtlinna changte chawimawina hun Vanapa Hall-ah an hmang a. Prof. Lalnilawma, Minister, Rural Development chuan khuallian niin a hmanpui. He hunah hian khuallian Prof. Lalnilawma chuan Mount Carmel School hlawhtlinna chu a lawmpui thu sawiin zirlaite fuihna thu a sawi a. Zirlaite chu harsatna an hmachhawn chang pawh a beidawng mai lo tura chahin chung harsatnate chu chhel nan leh tumruhna an neih lehzual nana hmang zawk turin a chah a. Hlawhtlinna kawng zawh chhuak tur hian buaina, harstana leh beidawnna paltlang thei tur a kan rilru leh taksa kan inbuatsaih tel a tul thu a sawi a ni.
Prof. Lalnilawma chuan Carmelians zinga Sawrkar Officer-a inziak tling tharte chu mipui rawngbawlna ngai pawimawh hmasa turin leh mi rintlak, ram hmasawnna tura an thiamna leh theihna te hmang tangkaitu nih tum tlat tura fuihin duhsakna a hlan bawk a ni. Zirlai hlawhtlingte lawmpuina hun ah hian Pu Lalnunkunga Sailo, Principal, Mount Carmel School, Chaltlang, Aizawl chuan Mount Carmel School din tan a nih dan leh kawng hrang hranga hlawhtlinna an hmuh dan a tarlang a. Pi Christine L. Sailo, Vice Principal chuan lawmthu sawina hun a hmang bawk a ni.
Vawiina chawimawite zingah hian HSLC & HSSLC Toppers-te bakah Combined Competitive Examination-a tling thar, MCS – 2; MF&AS – 1; MPS – 2 te bak ah MBBS, PG Surgery Gold Medalist Dr. Ellen Pachuau, Indian Football Team Player (Ayush Chhetri) leh Former Indian Basketball Player (H. Laldinsanga) te an tel a ni.
