Rural Development &Administration Minister, Tawi assembly Constituency bialtu MLA ni bawk Prof. Lalnilawma chuan vawiin khan a bial chhung mite tan Mizoram Food Processing Research & Training Centre (MFPRTC), Incubation Centre, Phaibawk, Seling-ah “Basic Food Processing Course” a ruahman kharna hun a hmanpui.He Course hawnna inkhawmah hian Minister Prof. Lalnilawma chuan Mizoram Sawrkarin sem policy aiin mahni kut ke a ding thei tura thiam inzirtir hi a ngaih pawimawh zawk thu a sawi a. Sum leh pai emaw ei leh in tur in pe dawn ila kan in pe sengin, kan in chawm seng dawn lo, mahse sum leh pai, ei leh bar thawhchhuak chhuak thei tur leh mahni ke a ding thei tura thiamna inzirtir hi a tlo zawkin eitling zawk a ni a ti a. A bial chhung mi te ngei maiin mahni a ei zawn theihna tur thiamna an nei tur chu lawmawm a tih thu a sawi a ni.
Minister chuan Food processing a pawimawhzia sawiin, Mizoram a kan thlai thar te hi process loh chuan a chhe mai zel a, chuvang chuan process a ngai a, chumi tur chuan thiamna neih a ngai a ni, a ti a. Mizoram a kan thei leh thlai thar te Kuthnathawk tuten man man zawk a an hralh theih nan Mizoram ah ngei hian kan process hian, eizawnna atan kan hmang thei a ni a ti a. A bial chhung mi training chhuak thiamna nei, bul tanna tur nei lo mahse eizawnna atan a hmang duh, mi taima leh tumruh, thil ti tak tak duh an awm chuan pui turin a in hawng reng tih a sawi bawk.
Mizoram Food Processing Research & Training Centre (MFPRTC), Incubation Centre, Phaibawk, Seling-ah hian Pickle siam, Jam siam, Powder siam, Chips siam, Juice siam, Vawnṭhat (preservation) leh Food Safety kalphung zirtir an ni a, mi 20 in kar khat chhung an zir a ni.MFPRTC Incubation Centre, Phaibawk, Seling a training chhuak thlahna inkhawm hun hi Pu Joseph L Ralte Centre Director in a kaihruai a, Minister Prof. Lalnilawma’n training chhuak te Certificate a hlan a ni.
