Vawiin khan Social Welfare & Tribal Affairs, Women & Child Development leh Tourism Minister Pi Lalrinpuii chuan Kolasib District chhunga ruihhlo ngaite enkawlna hmun Jordan Centre, Seṭhawn chu a dinhmun enfiahin a tlawh a. Hei bakah hian Thingdawl ICDS hmuna District Child Protection Office, Kolasib hnuaia Observation Home leh office thar sak mek leh Thingdawla Tourism Department hnuaia Highway Restaurant te a tlawh bawk.
Minister hi Mizoram Legislative Assembly Deputy Speaker Pu Lalfamkima leh Tuirial Bialtu MLA Pu K. Laldawngliana te bakah, Social Welfare Department aṭangin Principal Secretary Pu KT Beicho, Joint Secretary Pi Zonunthari, Joint Director Pi Ruth Vanlalsawmi leh Tourism Department aṭangin Director Pi R. Lalrodingi te’n an ṭawiawm a. Thawktute’n an lo dawngsawng a ni. Minister Pi Lalrinpuii chuan Jordan Centre chu fang kualin, thawktute leh ruihhlo ngai enkawl mekte a kawm a.
Thawktute nen an inkawmnaah hian tuna an dinhmun leh inenkawl dante sawi ho a nih bakah, rawtna an neih angte a ngaihthlaksak a. Ruihhlo ngaite enkawlna hmun chu ṭangkai leh changtlung zawka thuam ṭhat a nih theih dan kawng zawn a ṭul tih a sawi. Tun dinhmunah Jordan Centre-ah hian ruihhlo ngai enkawl mek mipa 22 leh hmeichhia 5 an awm mek a. Kum 2022 February thla aṭang khan ruihhlo ngai enkawl ṭan niin, vawiin thleng khan mi 648 enkawl an ni tawh a. Thawktu hi Centre Director nen mi 40 an awm mek a ni.
