June ni 27 (Ningani) a Lai Autonomous District Council hnuaia Village Council inthlanpui leh Lawngtlai Chandmary MDC by-election vote thlak turah vote zawn beihpui ngawrh taka kalpui mek a ni. Inthlanna buaipuitu tur lam pawhin thil tul pawimawhte a tahtawlin an bawhzui chho mek a. LADC hnuai-ah hian Village Council 99 a awm a. VC member mi 595 thlan chhuah tur a ni dawn a, chu’ng zingah chuan mitin chuh theih seat 496 a awm bakah hmeichhe tana hauh seat 99 a awm bawk a ni. Candidate leh an mahni puitute’n intinah lutin beihpui an thlak ngawrh tawh hle.
Lawngtlai East assembly bial a thlan tlin a nih avanga Dr. Lorrain Lalpekliana Chinzah in a chhuahsan tak Lawngtlai Chandmary MDC by-election neih tur a chuhtute chu BJP atangin Pu K. Lalawmpuia, MNF atangin Pu C. Lalsawmzuala, ZPM atangin Pu F. Hrangtukhuma te an ni a. Congress party chuan Candidate nei lo in MNF candidate Pu C. Lalsawmzuala an puih dawn thu an sawi.
State Election Commission hnuaia inthlan vote thlak turah hian District Election Office lam chuan thil tul paiwmawhte an buaipui chho zel a, Inrinni khan By-election neihna a inthlanna buaipui turte tan Training buatsaih a ni a, Postal ballot hmanga vote thlakturte tan hun hawn tan a ni bawk.
