High School Leaving Certificate (HSLC) result vawiina Mizoram Board of School Education-in vawiina a tihchhuahah exam zawng zawng zinga zaa 73.37 an pass. HSLC result chhuakah khan nikum aiin zirlai pass an thahnem zawk a. Nikum khan zirlai HSLC Exam hmachhawn zingah zaa 71.14 an pass a ni. HSLC exam result chhuakah hian pakhatna chu Lalmoipuia Lawmzual chu 1-na a ni a, pahnihna chu Vanlalmuanpuii, St. Paul’s Higher Scondary School niin pathumna chu H. Lalsangpuia, St. Joseph Higher Secondary School a ni a, a titha zual 10 ah mi 14 an lang a ni. Kuminah hian exam beitu hi zirlai 18,561 niin zirlai 13,618 in an pass-a. HSLC pass thar te hi Distinction-a pass mi 1,332, I Division-a pass mi 3,801, II Division-a pass mi 5,564 leh III Division-a pass 2,921 an ni a, II Division-a pass an tam ber a, I Division-a pass in an dawt a ni.
HSLC pass thar te hi hmeichhia 7181 niin mipa 6437 an ni a. Kumin HSLC exam-ah hian zirlai 4,837 in hlawhtlinna an chang thei ta lo a, compartmental chance pek zirlai 106 an awm bawk a ni. Result tihchhuah a nih veleh MBSE Chairman Pu JH Zoremthanga chuan MBSE pisaah chanchinbumite kawmin tluang taka an ruahman anga result an tichhuak thei chu High School zirtirtute inpekna leh thahnemngaihna vang te, Educational department pumpui tanrualna avang leh MBSE thawktute thawhrimna rah bakah an thawhpui department hrang hrangte inpekna vang a ni a ti a. Kumina compartment 106 awm te chu admission an tlai loh nan exam buatsaih thuai a nih tur thu a sawi a, MBSE syllabus chu CBSE syllabus nena a in an tlan thu leh exam ruahman dan chungchangah erawh hmasawnna tur a la awm avangin Board-in ke a pen zel thu a sawi.
Pu JH Zoremthanga chuan kumin exam-ah zawhna har zawng tehnaa a zangkhai deuh, LOTS zawhna zaa 60 leh a bak zawng zaa 40 chu tlema har deuh Application leh HOTS atanga siam a nih thu a sawi a, zirnain hma a sawn zel nan HOTS zawhna chu telh tam deuh deuh tura ruahman a nih thu a sawi a ni. Kumin Matric Exam-a pakhatna dinhmun hauhtu, Lalmoipuia Lawmzual chuan a sikul luhna St. Pauls Higher Secondary School-a a luh tirh atangin an zirtirtu ten an puihbawm that thu leh an chunga lawmthu a sawi tak meuh meuh thu a sawi.
