Vawiin khan District Sericulture Office, Mamit buatsaihin Lallula hall Darlung ah pangang khawitute tan Silk Samagra-2 capacity building programme buatsaih a ni a. He hun hi Pu V Zothansanga, Director of Sericulture, Aizawl chuan hmanpuiin, Pu Lalrinawma, Joint Director leh Pu B Lalchhuana, Deputy Director (Tech.)-te chuan Director hi an ṭawiawm a ni.
Pu V Zothansanga chuan Pangang khawitute hma a thu sawi thei a a awm chu lawmawm a tih thu a sawi a. India ram chu khawvela silk pangang tharchhuah a a pahnihna a nih mek thu sawiin khawvela a ber nih tum in Central sawrkar in hma a la mek a ti a. Silk Samagra-2 project kalpui mek chu 15th Finance Commission hnuaia a tawpna tur a nih thu sawiin, Pangang khawitute tuna an tharchhuah dan chu 16th Finance Commission ah tanpuina an dawn theih dawn leh dawn loh tehfung ah an hmang dawn a ni a ti.
Director chuan tanpuina dawn zawh ruala tawpsan mai an lo awm tawh thin thu sawiin, chutiang nilova tanpuina dawn chu bul tan nan a hman a pawimawh thu sawiin, Pangang khawitute tan teirei peih leh taihmak a pawimawh thu a sawi a. Khaw danga hma la tam vak tawhlo Mulberry Pangang khawi tang tang te pawh Project mumal zawk duangin hmalak tum a ni a, daih rei leh ngelnghet taka mulberry pangang khawi a hma la te Project/Scheme atanga inchhawmdawl zel tum a ni a ti. Kumthar lamah chuan Mulberry Cluster ang te neih tumin hmalak tum a nih thu a sawi bawk. Tin, CSB atanga Chawimawina (Best Rearer Awards) dawngtu Pu Vanrammawia ,Darlung khua chu State in a hmun ngei a lawmpuina a hlan thei chu lawmawm a ti hle. Augmentation of Muga Culture in Mizoram Project under Silk Samagra -2 kalpui mekah a ti tha te pawh lawmman siam tum a ni a ti.
