Vawiin khan Mizoram Journalists’ Association General Headquarters leh Mizoram Police tangkawp chuan ‘Seminar on Cyber Crime’ chu I&PR Hall, Mamit-ah an buatsaih a, Mamit bialtu MLA Er H Lalzirliana chu khuallian niin he hun hi a hmanpui. Er. H. Lalzirliana chuan tunlai khawvel changkang chho zel a kan buaipui ber leh kan ngaihtuah ber chu artificial intelligence leh cyber crime a ni a, kan hma hun a inchhawp pawimawh tak kan ngaihven ngai a nih thu a sawi a.
Cyber crime chungchangah hian awareness kan neih that a tul tih sawiin nasa taka tangrual a kan do a tul a ni, a ti a. Er H Lalzirliana chuan social media a kan thil post-ah te kan fimkhur a tul tih sawiin rilru hriselna leh kan thil post duh zawng te hi a inthlunzawm vek a ni a ti a, rilru hrisel tha put chu a pawimawhin cyber crime kan do theihna hmanraw tangkai tak a nih thu a sawi bawk.
Vawiin hun hi Pu C. Lalrambuatsaiha, President, MJA, General Hqrs chuan a kaihruai a, Pu Lalhuma President MJA Mamit chuan inlawmna thu sawiin Pu K. Zothanpara, General Secretary, MJA General Hqrs leh Pi Lalramhnehzauvi, Secretary, Mamit District MJA chuan report an pe a. Resource person – Pu Jeremia Vanlalhmachhuana, DSP, Cyber Crime leh Pu Joseph Lalhnehzela SI Cyber Crime te chuan cyber crime leh a lak a inven dan chungchangah zirtirna pein zawhna leh chhanna hun hman a ni bawk.
