Vawiin khan Mizoram Artists’ Development Society(MADS) buatsaih Mizo lemziak mite kutchhuak phochhuahna MADS Annual Art Exhibition 2024 chu Art Gallery, Lianchhiari Run ah I & PR Director Pu C. Lalnunkima’n a hawng a. Exhibition hawnna hi Conference Hall, Lianchhiari Run ah neih niin MADS in Painting Competition 2024 Category thum a an buatsaiha ti tha te hnenah lawmman sem nghal a ni.
I & PR Director Pu C. Lalnunkima chuan Mizo lemziak mite kutchhuak phochhuahna leh tihlarna chu duh angin mipuite hnenah a la thleng zau tawk lo nia a ngaihdan sawiin lemziak mite chu hemi kawngah hian tan la turin a fuih a, chungah te chuan Department in a thei ang angin a puih tur thu a sawi a ni. Lemziah chu mi tlemte in talent an neih nia sawiin an talent tihpun kawngah hmasawn zel turin a chah bawk a ni.
MADS Annual Art Exhibition ah hian MADS member 51 te kutchhuak 102 phochhuah a ni a, chungte chu acrylic painting 75, water colour painting 15, charcoal/pencil sketch 9, oil color 1 leh sculpture 2 te an ni. Exhibition hian tun kar chhung a awh dawn a, MADS chuan mipuite hnenah he Exhibition hi chhim turin an sawm a ni. MADS ah hian Member puitling mi 99 leh Associate Member 7 awm awm mek a, Associate Member dil mi engemawzat an awm mek bawk a ni. Painting Exhibition theme ah hian ‘Mizo thil’ tih hman niin Open, High School leh Middle School Category ah te inelna siam niin vawiin khan lawmman 1 atanga 3 leh consolation prize te pawh sem a ni bawk.
