Land Owners’ Co-Ordination Committee on NH 302 (Lungsen & Rangte VC Area) tia invuahte chuan, tun thlenga zângnadawmna la pek ve lohten an dawn thuai theihna tura thuneitute kar nan, Lungsen khaw chhunga VC pahnih leh Rangte VC huamchhungah kawng sialtute chu an hna an chawlh lailawktir a, vawiin bikah chuan kawng laituten hna thawh luih an tum loh avangin boruak sosang leh tha lo a thleng lo a ni.
Hetih lai hian Lunglei bawrhsap Pi Ramdinliani chuan, zângnadawmna la dawng ve loten an sum dawn tur an hmuh thuai theihna tura nawrna atan an ram chhunga hnathawh an remti lo chu hriatthiam a nih thu sawiin, zângnadawmna la fel tawh site ram chhunga kawng sialtute hnathawh tikhaihlak zawnga chetlakna a thlen lohna tur erawhin a tul anga hmalak a nih tur thu a sawi.
Ram neitu intelkhawmte chuan Tlabunga Doordarshan Palai zawhna chhangin, zângnadawmna la hmu ve loten an sum dawn tur an hmuh theihna tura a bawhzuina lehkha pawimawhte hmunpui lamah thawn thlak a ni ngei tih finfiahna an dawng a nih chuan, an hmalakna titawpa inhnuhhniam an hreh lo tih sawiin, hei hi tihhlawhtlinsak an nih loh erawh chuan naktuk lamah pawh hnathawktute chawlhtir zui zel an tum thu an sawi thung.
