Nimin khan Lunglei District-a zirna in (institution) hrang hranga zirlaite’n inthlan leh a kaihhnawih an hriat chian theihna atana din, electoral literacy club (ELC)-a mawhphurtu zirtirtu (nodal officer)-te tan Lunglei DC Conference Hall-ah ELC chungchanga thil pawimawh hrang hrang zir hona (orientation training) buatsaih a ni.
He hunah hian Lunglei District Election Officer, District Bawrhsap Pi Navneet Mann chuan nodal officer-te tana hriat tur pawimawh hrang hrang sawiin, ELC chu zirlaite’n inthlan kaihhnawih an hriat chianna tura din a nih ang takin ṭha taka kalpui tum turin a chah a. ELC kal tlangin zirlai kum tling tharte electoral roll-a an inziah luh vekna tura hma la tur te, zirlaite’n vote thlak pawimawhna leh inthlanna dik leh felfai neih a pawimawhna an hriat a, a taka an pen chhuah theih nana zirtir tur te’n a chah a ni.
He hun hi Election Officer Pi Lalhruaitluangi chuan a kaihruai a. Sub-Deputy Commissioner Pi Lalhlimpuii Pachuau chuan ELC din chhan leh an tih tur hrang hrangte a sawi zau va. Zawhna leh chhanna leh sawi hona hun hman a ni bawk. He hunah hian Lunglei District chhunga sikul 34 aṭangin ELC nodal officer-te an kal khawm a ni. Tun hnaiah Lunglei District chhunga zirna in hrang hrangahte ELC hi din thar leh niin, nodal officer-te pawh ruat nghal an ni a. July thla aṭangin nakkum January thlaa National Voters’ Day lawm hun thlengin inthlan kaihhnawiha inzirtirna atan ELC-te tih tur hmachhawp eng emaw zat ruahman lawk niin, hei hi zirna in hrang hranga ELC-te hian nodal officer-te kaihhruaina hnuaiah an bawhzui dawn a ni.
