Vawiin khan Lunglei District Superintendent of Police Pu J. Lalmuankima hovin a hna thawh pindanah kum 2025 Krismas hman zawh taka Lunglei District-a boruak muanawm tak a awm theih nana police-te duty dan thlir let a ni.He hunah hian Additional SP Pu K. Beihmotaosa bakah, zonal officer leh sector officer-a ruat police officer dangte an tel a. Zonal officer leh sector officer-te report ngaihthlak niin, Kumthar vuakveta duty chhunzawm dan tur sawi ho a ni bawk.
He huna tar lan a nih danin, kum 2025 Krismas vuakvetah Lunglei District-ah thil duhawm lo a thleng lo va. Boruak muanawm tak hnuaiah Krismas hi hman niin, lirthei chetsualna (motor accident) thleng report dawn a ni lo bawk. Krismas vuakveta thubuai (case) ziah luh (register) a tlem chhan chu tlawmngai pawlte puihna bakah, Police zonal officer, sector officer leh duty-te hna thawh ṭhat vang a nih thu tar lan a ni.
Lunglei Police thuneitute chuan ni 31.12.2025 aṭanga ni 04.01.2026 thlengin sawrkar pisa chawlh a nih dawn avangin hemi hun chhung hian office hotute chu an office building leh a huam chhungte veng ṭha tur leh tlawh zing tura ngenin, office veranda te pawh zanah tieng ṭhin turin an ngen a. Kum hlui thlah zanah mipuite halpuah leh halmawi bakah, puak thei chi reng reng hal lo turin an ngen bawk. He hunah hian halpuah leh halmawi chungchanga District Magistrate-in khapna thupek a chhuah tawh anga khauh taka hma lak dan tur sawi ho a ni bawk a. Kum thar lo thleng tur hmuahnaah police leh traffic lam chu inthlahdah lova duty ngawrh taka chhunzawm tur leh veng kilkhawr lamte pawh tlawh kual vek tura hriattir an ni.
