Lunglei District-a sikul naupang sikul kai ip (bag) rit lutuk chhawk zangkhai nana District Bawrhsap hova ruahmanna siam hrang hrangte zirna in te’n an zawm ṭhat leh zawm ṭhat loh endikin vawiin khan inspection team an thawk chhuak.Inspection team hi Lunglei Sub-Deputy Commissioner Pi Lalhlimpuii Pachuau chuan hovin, Sub-Divisional Education Officer (Lunglei South) leh thawktu dangte an tel a. Sikul pali – Baptist Higher Secondary School, Serkawn; Baptist English School, Serkawn; Government Middle School, Pukpui leh Government JNM Middle School, Electric Veng te tlawhin, sikulah lehkhabu riahna tur bawm (locker/shelf) a awm em tih te, ni khata subject neih zat te, ni khata home work neih zat te, sikula tui thianghlim in tur a awm leh awm loh te an endik bakah, sikul naupangte ip rih zawng te an teh bawk a ni.
Lunglei District Bawrhsap hova sikul naupang ip rit chhawk zangkhaina tura ruahmanna siam a nih angin, sikul tinin lekhabu dahna (bookshelf) ruahman tur te; sawrkar inkaihhruaina anga ni khatah Class I & II tan subject 3, Class III – V tan subject 4, Class VI – X tan subject 6 anga class kalpui tur te; homework pek chungchangah ni tin primary school-ah subject 1, middle school-ah subject 2 leh high school & higher secondary school-ah subject 3 aia tam pe lo tur te leh sikul tinah zirlaite’n tui in tur thianghlim leh hnianghnar an neih theih nan ruahmanna siam tur te’n District Election Officer aṭangin sikul tinah hriattirna pek tawh a ni a.
He ruahmanna hi sikul hrang hrangin an zawm dan endik turin inspection team hi din niin, a remchan danin endik hna hi an la kalpui chhunzawm zel dawn a ni.
