Vawiin khan Lunglei District Police Cyber Cell te hma laknaa CEIR Portal hmanga mobile phone bo/ruk hmuh let mobile phone 24, cheng nuai 3.53 (₹3,53,174/-) man hu chu a neitu dik takte hnena hlan letna hun hman a ni. He hun hi Lunglei Additional Superintendent of Police Pu K. Beihmotaosa, Lunglei Sub-Divisional Police Officer Pu H. Lunghnema, Lunglei Police Station Officer-in-Charge leh officer-te’n hmanpuiin, mobile phone neitute an tel bawk.
Addl SP Pu K. Beihmotaosa chuan Mizoram chhung leh pawnah mobile phone bo leh ruk bo a tam tih sawiin, Lunglei Cyber Cell chuan report an dawn tawh phawt chu CEIR Portal kal tlangin a tam thei ang ber chhui chhuahsak zel an tum tih a sawi a. Phone bo zawn chu thil hautak leh awlai lo tak a nih thu sawiin, a hlawhtlinna pawh CEIR Portal ṭangkai leh awmze nei taka hman ṭhin vang leh Cyber Cell staff-te thawhrimna vang a nih thu a sawi a. Mobile phone hlui (secondhand) leitute pawh fimkhur a ngaih thu sawiin, mobile phone bo rinhlelhawm tih hre reng chunga man tlawm tak taka lo leisaktute emaw, lo thleng saktute emaw chu an chungah dan anga hma lak a nih tur thu a sawi a.
Chuti anga tite chu thubuai pawh siamsak nual an nih tawh thu a sawi.Lunglei Police Cyber Cell hian July ni 11, 2024-a din a nih aṭanga vawiin thlengin CEIR Portal kal tlangin mobile phone bo leh ruk bo 194 an hmuh letsak tawh a ni.
