Zanin khan Nehru Yuva Kendra (NYK) Lunglei, District Administration Lunglei leh Young Mizo Association (YMA) Lunglei Sub-Headquarters Kumpuan Committee te ṭang ho huaihawtin YMA Recreation Centre, Bazarveng, Lungleiah YMA Bazarveng Branch Lunglei member-te tan ruihhlo ṭhat lohzia inzirtirna leh natna inkai chhawn theih loh, non communicable disease (NCD) chungchang inzirtirna hun, “Awareness & Education on Drug Addiction & Substance Abuse & NCD Awareness” buatsaih a ni.
He hun hi Sub-Headquarters YMA Kumpuan Committee Secretary Pu C. Lalrindika chuan a kaihruai a. Lunglei Additional Deputy Commissioner Pu James Miahlung leh NYK State Director i/c NYK Lunglei District Pi Mercy Sellate te’n hun hmanpuiin, ṭhalaite fuihna thu an sawi a. WADA, Lungleia Counsellor Pu Ch.
Lalhruaitluanga chuan ruihhlo hman khawloh leh ngawl veina chungchang leh a nghawng ṭha lo tak tak te, ruihhlo laka fihlim tur leh ruihhlo dona kawnga thil pawimawh hrang hrang a zirtir a. Civil Hospital Lungleia Medical Officer Dr Lalremmuana chuan natna inkai chhawn theih loh chungchang leh a veite’n harsatna hrang hrang an tawh dan te, vei lo tura nunphung uluk a ṭul dan te bakah, taksa hriselna atana thil pawimawh hrang hrang a zirtir bawk.
