Aspirational Block Programme (ABP) hnuaia Lunglei District chhung Lungsen RD Block-a hma lakna kalpui mekah vawiin khan Lunglei District Bawrhsap Pi Navneet Mann hovin a hna thawh pindanah zirna (education) chungchanga hmasawnna tur leh hma lak zel dan tur sawi ho a ni.
He hunah hian Additional Deputy Commissioner Pi Rochuangkimi Khenglawt, Lunglei District Project Coordinator (Samagra Shiksha) leh Lungsen Sub-Divisional Education Officer ai awhte leh Aspirational Block fellow te an tel a. Hmasawnna tehfung atana thlan bik, Key Performance Indicator (KPI) hrang hranga hmasawnna te thlir ho niin, hmasawnna ṭha zawk leh chak zawk a awm theih nana hma lak dan tur rawtnate sawi ho a ni.
Lungsen Aspirational Block hnuaiah hian zirna in (sikul) 55 awmin, primary school 23, middle school 24, high school 7 leh higher secondary school 1 a ni a. He’ng school te hian result ṭha zawk an neih theihna tur leh naupang a laklawha zirna bansan (dropout) an awm lohna tur te, online MIS hman mek UDISE Plus-a data dik zawk leh ṭha zawk a awm theih nana hma lak dan tur te sawi ho a ni a. Block Development Officer-in DEO leh SDEO te nen ṭang hovin UDISE portal zir chiangin, zirtirtute’n samkhai zawka training an neih theih dan tur ngaihtuah ni se, tih a ni a. Dropout rate tlak hniam theih nan zir chianna (survey) buatsaihin, chumi aṭang chuan ruahmanna siam ni se, tih a ni bawk.
