Vawiin chawhnu khan Leitlangpui Music Festival 2024 Organising Committee chu Lunglei DC Conference Hall-ah an ṭhu khawm. He ṭhut khawm hi Organising Committee Secretary & Lunglei Municipal Council (LMC) Chief Executive Officer (CEO) Pu Donny Lalruatsanga chuan kaihruaiin, inlawmna thu a sawi a. Sawrkar hma lakna leh Tourism Department duhsakna avanga Leitlangpui Music Festival 2024 buatsaih a ni tur chu lawmawm a tih thu a sawi.
Organising Committee Vice Chairman, Tourism Department Director Pi R. Lalrodingi chuan sawrkar laipui Ministry of Tourism kal tlangin kum tin festival ṭum hnih buatsaih a nih theih nan fund hmuh ṭhin a nih thu sawiin, kuminah pawh Tourism Department chuan Leitlangpui Music Festival hi Lungleiah nei turin ruahmanna a siam tih a sawi a. He Leitlangpui Music Festival hlawhtlin nan hian sawrkar department hrang hrang leh pawl hrang hrang te, District mipuite thawhpuina leh ṭawiawmna an mawmawh tih a sawi.
Leitlangpui Music Festival hi November ni 14-16, 2024 chhungin Lunglei Pukpuiah buatsaih ni se, tih a ni a. Beat Contest Competition, Concert, Food Stall, Museum leh Cultural Programme te buatsaih tura ruahman niin, sawrkar department hrang hrangte leh pawl hrang hrangte chanvo leh mawhphurhna siam a ni a. Sub-Committee hrang hrang din niin, Media & Publicity Sub-Committee convener atan DIPRO leh MJA Lunglei District te ruat an ni a; Ushering & Reception Sub-Committee leh Refreshment Sub-Committee chu Sub-Headquarters YMA te kutah dah a ni bawk a. He’ng bakah hian Accomodation Sub-Committee, Food Stall Sub-Committee leh Music Competition Sub-Committee te din a ni bawk.
