Vawiin khan Lunglei SP Conference Hall-ah Lunglei Police-a hnu chhuitu, case investigating officer (Case I/O)-te leh Lunglei District Court-a sawrkar ukil (public prosecutor)-te chuan inkawm hona leh thil zir hona (meeting cum workshop) hun an hmang a. Dan bawhchhiatna a lo thlena hnu chhuina (case investigation) kalpui dan tur te, hnu chhuina kawnga fimkhur leh ṭan lak ngaihna laite an sawi ho.
He hunah hian Police Case I/O, Public Prosecutor leh Assistant Public Prosecutor mi 24 an tel a. Lunglei District Superintendent of Police Pu J. Lalmuankima chuan ṭhut khawm hi kaihruaiin, hnu chhuina kawnga hriat tur pawimawh hrang hrang a sawi a.
Kal khawmte’n hnu chhui chungchanga hmasawnna tur te, pawi khawihtute dan anga hrem an nih ngei theih nana hma lak dan tur leh hnu chhuitute tana dan hriat tur pawimawh hrang hrangte sawi hovin, an zir ho a ni.
