Vawiin khan DC Office, Health & FW leh I&PR official-te leh LushAITech ai awhte chu Lunglei District Bawrhsap Pi Navneet Mann kaihhruaiin a hna thawh pindanah an ṭhu khawm a. “Healthy Lunglei District Campaign” kal tlanga January ni 29, 2026-a tlangzarh tak, “LushAI Healthy Lunglei” (LHL) Mobile App chu mipuite’n ṭangkai zawka an hman theih nana tihchangtlun dan tur leh tihlar dan tur an sawi ho.
Thawktute leh mipuite’n LushAI Healthy Lunglei app an hman dan report ngaihthlak niin, LushAITech lam aṭangin app tihchangtlunna kawnga an hma lak dan report ngaihthlak a ni bawk a. App kal tlanga doctor appointment late’n hriattirna an dawn theih dan tur te, doctor leh damdawi dawrte’n anmahni dawrtu an awm tih hriattirna an dawn theih dan tur te, damdawi chah duhte’n dawr hlat zawng leh a phurhna man ngai zat an hriat nghal theih dan tur te, damdawi leh a kaihhnawih chah theih dah belh dan tur te, doctor-in damdawi a chawhna lehkha app-a dah luh dan tur leh app hmangtute puitu AI chatbot tihchangtlun dan tura rawtna leh hma lak dan tur hrang hrang sawi ho a ni a. LushAITech lam chuan app viltu bik an indah thu leh rawtna hrang hrang hmangin a tah tawla app an tihchangtlun zel thu an sawi.
Healthy Lunglei app hi Android Playstore aṭangin mi 370, Apple iOS App Store aṭangin mi 30, belh khawmin mi 400-in an phone-ah an dah lut (download) tawh tih tar lan a ni a. App kal tlang hian Civil Hospital Lungleiah mi 48 leh PHC hrang hrangah mi 70 bawr vel chu damdawi ina inentir tura an inziah luh tawh thu te, ABHA ID siam nan te pawh hman a nih thu te tar lan a ni a. Healthy Lunglei app hi mi tam zawkin an hman ṭangkai theih nan thlalak leh lem che hmanga tihlar leh branch YMA leh college zirlaite zinga inzirtir kalpui tura rel a ni a. Bawrhsap chuan a taka app hman ṭangkai dan enfiah turin March ni 11 leh ni 12-ah te damdawi in hrang hrang tlawhin, May 2026-ah damdawi in hrang hrangah LHL app kal tlanga inziak luta NCD endikna kalpui tum a ni a. App hman ṭhat kawnga YMA branch leh college te inelna chu May 2026-ah buatsaih tum a ni bawk.
