Vawiin khan Lunglei District TB (Tuberculosis) Forum chu an Chairman, Lunglei District Bawrhsap Pu R. Lalṭhazuala hovin Lunglei DC Conference Hall-ah an ṭhu khawm.
Chairman Pu R. Lalṭhazuala chuan Mizote’n ngawr kan tih mai TB natna chu kan pi pute hunah thihpui ngei ngei tura ngaih a ni ṭhin a, tunah erawh chuan enkawlna ṭha tak nen tihdam zung zung theih a ni tawh tih sawiin, India ram aṭanga TB natna um bo turin National Health Mission (NHM) hnuaiah National TB Elimination Programme (NTEP) kalpuiin, hriselna lama thawktute’n theih tawp chhuahin an bei tih a sawi a. Hriselna kawnga District hmasawnna tura hma lakna pawimawh tak a nih angin TB do kawnga thawktu health department leh tlawmngai pawl – Piramal Swasthya Foundation te chu ṭha taka thawhpuia ṭawiawm turin District mipuite a ngen a ni.
He ṭhut khawmah hian sawrkar official-te, NGO leh MJA ai awhte leh TB champion te an tel a. District TB Officer Dr K. Lalhmachhuana chuan District TB Forum hnuaia hma lakna report pein, ṭhut khawm buatsaih chhan a sawifiah a. Kum kal ta leh kal meka TB lama hma laknaa Lunglei District dinhmun thlir ho niin, TB tirem tur te, zau zawka inzirtirna kalpui tur te, TB veite chhawmdawlna leh hamṭhatna atana hmachhawp awmte leh hmasawnna tura rawtna hrang hrangte sawi ho a ni.
Kum 2023 (January – December) chhungin Lunglei health district (Lunglei District leh Hnahthial District)-ah ngawr (TB) vei rinhlelh CBNAAT khawla endik 1,023 aṭangin TB vei hmuh chhuah 148 (chuap TB 101 leh chuap ni lo TB 47) an awm a. Mi 55 enkawl dam niin, enkawl zawh fel (complete) 86 leh enkawl dam fel hman loh (failure) 1 an awm a. TB vei enkawl laia thi 7 an awm bawk.
Kumin 2024 (January – September) chhungin Lunglei health district-ah TB rinhlelh CBNAAT khawla endik 688 aṭangin TB vei hmuh chhuah 113 (chuap TB 62 leh chuap ni lo TB 51) awm tawhin, mi 6 enkawl dam tawh an ni a. Enkawl zawh fel tawh (complete) 39 awmin, enkawl lai 65 an awm a. TB vei enkawl laia thi 3 an awm tawh bawk.
District TB official-te chuan TB hrik en leh damlo enkawlna chu sawrkarah a thlawn vek a nih bakah, Nikshay Poshan Yojna (NPY) hnuaiah damdawi ei chhung zawng thla tin ₹ 500/- pek an nih thu leh inenkawl zawh hnuah ₹ 750/- pek ṭhin an nih thu sawiin, TB chu enkawl hma a, ṭha taka damdawi ei chuan a dam hmain, harsatna nasa zawk a pumpelh theih tih an sawi a. Hei bakah hian TB veite’n an inenkawl chhunga chaw ṭha an dawn theih nan mi inphal (Nikshay Mitra)-te hnen aṭangin ṭanpuina sum dawn ṭhin a ni bawk a. Lunglei District chhungah Nikshay Mitra (donor) 52 awm tawhin, hemi sum hmang hian thla khatah damlo pakhat tan ₹ 700/- man hu ei tur ṭha leisaka pek ṭhin an ni a. Nikshay Mitra tur hian thla tin ₹ 700/- hisapin thla ruk emaw, a aia rei emaw chhung atan ṭanpuina pek theih niin, District TB Forum chuan TB veite tan mi inphalte pen chhuak zel turin a ngen a. Heti anga inphal, ṭanpuina pe theite chu Lunglei District Senior Chief Medical Officer office-ah inhriattir theih a ni.
He hunah hian Lunglei District chhunga khaw tam thei ang ber TB awm lohna khua (TB free village)-a puan a nih theih nana hma lakna kalpui mek chungchang sawi ho a ni bawk a. TB free village ni tur hian kum khat (January – December) chhungin khaw khata mihring cheng zat azirin mi 1,000 zelah mi 30 tal endik tur niin, mi 1,000 zelah TB vei nem ngheh mi 1 aia tam an ni tur a ni lo va; TB vei enkawl hlawhtlin 85% aia sang tur niin, TB veite chuan NPY leh Nikshay Mitra ṭanpuina an dawn ngei a ṭul bawk a. He’ng tehna hrang hrang aṭang hian nikum 2023 khan Lunglei health district hnuaiah TB free village khaw 18 (Lunglei District-ah khaw 13 leh Hnahthial District-ah khaw 5) awmin, he’ng khaw 18 hian Mahatma Gandhi statue bronze leh citation an dawng a. A kum hnihna atana TB free village ni a, statue silver dawng thei turin inbuatsaih chhoh leh mek a ni a. Kumin 2024-ah khaw 40 chuang chu TB free village-a puan belh turin hma lak leh mek a ni bawk a. TB free village-a puang tur hian Health & Wellness Officer leh health centre-a thawktute chuan an khuaah kal chilhin khawtlang hruaitute leh tlawmngai pawl hrang hrangte chu inkawm hona leh inzirtirna hun an hmanpui ṭhin a ni.
