Vawiin tlai khan December ni 4, 2024-a Lunglei District Level Yuva Utsav (Youth Festival) buatsaih tur atana organising sub-committee chu an Convener, Lunglei District Education Officer Pi K. Lalrintluangi hovin a pisaah an ṭhu khawm. He ṭhut khawmah hian line department hrang hrang – NYK, DEO, I&PR, SYS leh A&C official-te, Sub-Headquarters YMA leh Mizoram Independent School Association (MISA) Lunglei ai awhte leh host institution – KT College Principal leh zirtirtute an tel a. Nehru Yuva Kendra (NYK) State Director & Lunglei District incharge Pi Mercy Sellate chuan District Level Youth Festival (Yuva Utsav) buatsaih tur chungchang sawi fiahin, sub-committee Secretary Pu Joseph Lalngaisanga Chhakchhuak hnen aṭangin hma lak tawh chin report ngaihthlak a ni a. He Yuva Utsav buatsaih tura item hrang hranga endik turte ruat niin, thil pawimawh hrang hrang atan ruahmanna siam a ni bawk.
Organising Committee chuan Yuva Utsav hi December ni 4, 2024-ah Saikuti Hall, Lungleiah buatsaih turin a lo rel tawh a. He hunah hian science mela (group leh individual), painting (lemziak) competition, poetry (hla phuah) competition, mobile photography (phone hmanga thlalak) competition, declamation contest (English/Hindi-a thu insawisiak) leh cultural festival (hnam lam) inelna te a awm dawn a. Inelnaah hian ṭhalai kum 15 – 29 inkar a duh apiang tan tel theih a ni a. Inelnaa a ti ṭhate hian state level inelna hmachhawn lehin, state level-a ti ṭhate’n national level inelna an hmachhwan leh dawn a ni.
Yuva Utsav-ah hian inelna bakah exhibition buatsaih tel tum ni bawkin, department hrang hrang leh self help group te’n dawhkan (stall) hungin, an thil siam chhuah zawrhna leh sawrkar laipui ruahmanna (scheme)-te mipui hnena puanzarna remchangah an hmang bawk dawn a ni.
