Vawiin khan Lunglei District Monitoring Committee huaihawtin Lunglei DC Conference Hall-ah Mizoram Bana Kaih (Handholding) Scheme hnuaia hma lakna thlir hona leh hma lak zel dan tur zir hona (District Level Workshop) buatsaih a ni. He hun hi Lunglei District Bawrhsap Pi Navneet Mann chuan kaihruaiin, kal khawmte lawmna thu a sawi a. Bana Kaih Phase-I chu Lunglei District-a department, bank leh mipuite’n an dawnsawn ṭhat thu leh progress partner mi 300 lai ziah luh an nih thu sawiin, a rem rem thawk leh lo neiha ei zawng mi eng emaw zatin he scheme avang hian ei zawnna ngelnghet leh ṭha zawk an neih phah tawh tih a sawi a. Ei zawnna bul ṭan tura bank kal tlanga sum puk kawngah a pung a san ṭhin avangin mipuiin an huphurh ṭhin tih sawiin, Bana Kaih Scheme hnuaiah erawh chuan a pung a tlem bakah sawrkarin a rulhsak dawn a, bank te pawhin ngai pawimawhin awlsam zawkin loan an pe chhuak ṭhin tih a tar lang a. Bana Kaih Phase-II kalpui mekah a tam thei ang berin loan dil turin District mipuite a chah.
DMC Chairman Pi Navneet Mann chuan Bana Kaih Scheme hlawhtlinna tur leh mipuiin an chhawr ṭangkai deuh deuh theih nan line department-te chu theih tawp chhuah turin a chah a. Phase-II-ah Lunglei District aṭangin progress partner tam zawk thlan chhuah ni se a duh thu sawiin, progress partner thlan chhuahte chu a changtu department-te’n ṭha taka vil zui a, hma lakpui zel turin a chah bawk. He Workshop hi Mizoram State Policy Coordination Committee (MSPCC) aṭangin Mizoram Bana Kaih (Handholding) Scheme Chief Executive Officer (CEO) Pu Lalfakzuala, MSPCC Member Pu Lalchhuanawma Hrahsel leh official dangte’n hmanpuiin, implementing department hrang hrang leh bank ai awhte an tel a. Lunglei District Urban Development Officer Pi Lalhruaitlungi chuan report pein, department-te’n harsatna an tawh tlangpuite a tar lan bakah, loan pek chhuah chungchanga bank leh department inkara inbiak pawhna leh inhriat pawhna ṭha a awm a ṭul thu te, chu chu progress partner-te hma lakna vil zui kawnga thil pawimawh tak a nih thu te a sawi.
Handholding CEO Pu Lalfakzuala chuan Bana Kaih hnuaia loan pek chhuah theih hrang hrangte, Kisan Credit Card (KCC) leh loan dangte ṭangkaina leh ṭhatnate PowerPoint Presentation hmangin a sawi fiah a. MSPCC Member Pu Lalchhuanawma Hrahsel chuan Bana Kaih Scheme hnuaia scheme hrang hrangte mipuite’n ṭangkai leh hlu zawka an hman theih nan inzirtir tam leh puanzar zau a pawimawh thu a sawi a. Bana Kaih loan dil dan leh Phase-I-a progress partner-te hlawhtlinna chanchin thlir ho niin, zawhna leh chhanna leh sawi hona hun hman a ni bawk a. Sub-Deputy Commissioner Pi Lalnunchhani Hnamte chuan lawm thu sawiin hun a khar.Mizoram Bana Kaih (Handholding) Scheme Phase-I hnuaiah Lunglei District chhungah department 10 kal tlangin progress partner 42 hnenah loan cheng nuai 234.4 pek chhuah tawh niin, Chief Minister’s Special Package hnuaiah progress partner 368 hnenah cheng nuai 288.27 pek chhuah a ni bawk a. September ni 20, 2025 aṭangin Phase-II hnuaiah dilna hun hawn leh mek a ni.
