Vawiin khan Lunglei DC Conference Hall-ah District Disaster Management Authority (DDMA) Chief Executive Officer, Additional Deputy Commissioner Pi Rochuangkimi Khenglawt hovin Lunglei khawpui chhunga khua leh tuite ven himna kawnga chet lak dan tur nunchan zirna (civil defence mock drill) buatsaih tur chungchang sawi ho a ni.
He hunah hian DDMA member-te, line department hrang hrang hotute, sipai hotute leh Sub-Headquarters YMA ai awhte an tel a. Van sang aṭanga beihna (air raid) lo thlen thulha ram mipuite himna atana chet lak dan tur nunchan zirna (civil defence mock drill) chu May ni 15, 2025 (Ningani) zing dar 11:00-ah Lunglei khawpui hmun hrang hrangah buatsaih ni se, tih a ni a. Hemi ni vek zan lamah minute nga chhung a rualin khawpui chhunga eng tihthim (blackout exercise buatsaih) ni bawk se, tih a ni a. Hemi atana inpuahchah dan tur leh thil pawimawh hrang hrangte sawi ho niin, mawhphurtu hrang hrang ruat an ni a. Mock drill leh blackout exercise hlawhtling taka kalpui a nih theih nan thuneitute ruahmanna ṭha taka zawm turin meeting chuan Lunglei mipuite a ngen a ni.
He hunah hian civil defence chungchanga tih tur ṭul hrang hrang sawi ho nghal a ni a. Mipui khawsak mamawh hrang hrang a khaihlak loh nana ruahmanna siam dan tur te, damdawi in leh hmun pawimawh hrang hrangte’n inralrinna atana an tih tur te, mipui hnena hriat tur pawimawh puanzar dan tur chungchang te sawi ho a ni.
