Vawiin khan Lunglei District Bawrhsap Pi Navneet Mann kaihhruaiin Lunglei DC Conference Hall-ah District chhung thingtlang khuaa zirlaite tana lehkhabu khawn khawm runpui, “Book Nest Initiative” kalpui dan tur sawi ho a ni.
He hunah hian “Ni Khat Atan Bawrhsap” tih hma lakna hnuaia Zirlai-Bawrhsap paruk te, DC officer-te, Education, UD&PA leh I&PR official-te leh Sub-Headquarters YMA hruaitute an tel a. Bawrhsap Pi Navneet Mann chuan thingtlanga zirlaite’n zirlaibu leh lehkhabu chhiar tur ṭha duh khawp an neih loh avangin zirna kawngah an hnufual phah ṭhin tih sawiin, hemi harsatna su kiang tur hian khawpuia mite zirlaibu leh lehkhabu hlui, la ṭha tak tak si thawh thei tur zawn a, khawn khawm a, thingtlang, a bik takin Lungsen Aspirational Block chhunga a mamawhte hnena thawn chhuah chu he hma lakna hian a tum a nih thu a sawi a. Chumi atan chuan Lunglei mipuite inphal taka pen chhuak tura sawmin, YMA leh MHIP te chu he hma laknaa kutke pawimawh ber tur an nih angin an thawhpuina leh ṭawiawmna a ngen bawk.
“Book Nest Initiative” hnuaia lehkhabu khawn khawm hi September ni 8, 2025 aṭanga ṭanin, chawlhkar hnih chhung kalpui ni se, tih a ni a. Lunglei khawpui chhunga mahni veng chhunga khawn khawm buaipui turin Sub-Headquarters YMA kal tlangin Branch YMA te ngen ni se, a ṭul anga lo puibawm turin MHIP member-te leh UD&PA hnuaia Self Help Group (SHG) member-te ngen ni bawk se, tih a ni a. Lehkhabu khawn chhuak ṭha branch 5 leh SHG te tan lawmman siam tum ni se, tih a ni bawk.
