Lunglei District Bawrhsap hma laknain, Lungsen Aspirational Block-a zirlaite tan Lunglei khawpui chhungah lehkhabu khawn khawm runpui, “Book Nest Initiative” kalpui mek niin, September ni 8, 2025 aṭanga ṭanin Lunglei khawpui chhunga Sub-Headquarters YMA hnuaia YMA branch 21 kal tlangin lehkhabu khawn khawm mek a ni.
YMA branch hrang hrang hnuaia section YMA te chuan an huam chhung in tinah kal chilhin zirlaibu leh thawnthu bu hluite an khawn khawm mek a. Branch ṭhenkhat chuan lehkhabu hi khawn zo tawhin, a khawn khawm bik hi tun kar chhunga zawh fel beisei a ni a. Lehkhabu khawn khawm sa hi branch tinah YMA leh Self Help Group (SHG)-te’n thliar felin, sem chhuah tlak a nih leh nih loh an endik hnuah Sub-Headquarters YMA Office-ah dah khawm a ni ang a. Sem chhuah theiha ruahman fel a nih hnuah Lungsen Aspirational Block huam chhunga sawrkar sikul 60 thlan chhuahte hnenah sem tura ruahman a ni.
Luangmual Branch YMA chuan an huam chhunga lehkhabu khawn khawm hi zo tawhin, nizan khan Lunglei District Urban Development Officer Pi Lalhruaitluangi leh Sub-Deputy Commissioner Pi Lalhlimpuii Pachuau te hovin YMA member-te leh SHG member-te chuan lehkhabute hi an thliar fel nghal a ni.
