Vawiin chawhnu khan District Programme Officer, Women & Child Development Deparment leh District Education Officer te ṭang kawp huaihawtin School Education Complex, Lungleiah Beti Bachao, Beti Padhao (BBBP) hma lakna pualin thing phun a ni. He hun Lunglei District Programme Officer (Women & Child Development) Pu C. Lalnunfela kaihhruaiah hian Lunglei District Bawrhsap Pu R. Lalṭhazuala chuan thu sawiin, hmeichhe naupangte chu hleilenna leh tihduhdahna lakah sawrkarin a venhim tlat thu a sawi a. Hmeichhe naupangte zirna lama chawi kan leh kawng tin renga hma an sawn theihna tur te ngaihtuahin, an hamṭhatna atan hma a la reng a ni, a ti.
He hun hi hmeichhe naupangte chawi kanna atana buatsaih niin, Beti Bachao Beti Padhao-in a tum ber chu India rama nau piang zat, mipa leh hmeichhia inthlauhna nasa tak tireh tur leh naute, nu pum chhunga an awm laia khawl hmanga mipa nge hmeichhia an nih en lawk te, hmeichhia an nih hriat lawk avanga nau tihtlak emaw an pian hnua an dinhmun chanvo rahbehsak leh mipate nena an dinhmun inthlau lutuk tihrehna tur tea hma lak a ni.
Beti Bachao Beti Padhao puala thing phunnaah hian Lunglei DC Pu R. Lalṭhazuala, DPO (WCD) Pu C. Lalnunfela, leh DEO Pi K. Lalrintluangi te chuan School Education Complex-ah thing ṭiak an phun a ni. Government Leitlangpui High School-a CIass-X zirlaite chu he hunah hian telin, zirlai naupangte hnenah hian hmeichhiate hamṭhatna leh venhimna atan thil pawimawh hrang hrang ziahna bookmark leh leaflet te sem nghal a ni bawk.
