Vawiin khan Lunglei South bialtu MLA Pu Lalramliana Papuia hovin Lunglei District Disaster Management Authority (DDMA) ai awh team te, NHIDCL hotute, contractor-te leh khawtlang hruaitute nen Theiriat leh Hrangchalkawn inkar National Highway-54 kawngpui laih zauh hna thawh mek avanga lirthei tlan khaihlak leh khualzinte tana harsatna awm ṭhin chungchangah kawng dinhmun leh mipui harsatna sut kian dan turte a hmunah kal chilha enfiah a ni.
Lunglei South bialtu MLA Pu Lalramliana Papuia hi DDMA aṭangin Chief Executive Officer & Additional Deputy Commissioner (G) Pu James Miahlung, Additional Superintendent of Police Pu K. Beihmataosa leh Zone IV Zonal Officer & District Civil Supply Officer Pu Lalremruata Sailo te’n an ṭawiawm a. He lai kawngpui enkawltu NHIDCL hotute, hna thawktu contractor-te leh khawtlang hruaitute nen kawng dinhmun leh mipuiin harsatna an tawh ṭhin dan te, kawng helna ruahman dan te en ho niin, contractor-te’n harsatna an neihte pawh ngaihthlak a ni.
He kawngpui hi Lunglei khawpui mai bakah Lunglei chhim lam tan kawng pawimawh tak a nih avangin khualzin veivakte’n harsatna an tawh zel loh nana siam ṭhat thuai dan kawng zawn ni se, tih a ni a. Kawng siam ṭhat dan tur leh mipui harsatna chin fel dan tur ruahmannate sawi ho niin, Lunglei DDMA enpuina hnuaiah NHIDCL leh contractor-te’n lo bawhzui nghal se, tih a ni.
