Lunglei High Powered Committee (HPC) Vice Chairman, Lunglei North bialtu MLA Pu V. Malsawmtluanga chuan nimin leh vawiin khan a bial chhunga a mamawhte tan tui leh ṭanpuina thilpek a sem. Pu V. Malsawmtluanga hian vawiin khan Lunglei khawpui chhunga a bial a fang kual a. Young Mizo Association (YMA), Pukpui Branch-in Pi Laltlanthangi chenna in sak ṭhat an tum mek chu a hmunah tlawhin, in sakna tur ṭanpuina pawisa fai ₹ 2,00,000/- (cheng nuai hnih) a hlan a ni. Pu V. Malsawmtluanga chuan inthlan dawnin mi rethei zawkte’n lei rem an rah ve theih nan theih tawp chhuah a tum thu a sawi ṭhin thu sawiin, a bial chhungah harsatna nei mi tute pawhin a hnenah an harsatnate thlen hreh lo se a duh thu a sawi.
Pu V. Malsawmtluanga hian vawiin vek khan Mizo Upa Pawl (MUP), Pukpui Unit te Golden Jubilee pual hnatlang chu tlawh bawkin, Golden Jubilee hmanna tur pawisa fai ₹ 1,00,000/- (cheng nuai khat) a hlan nghal bawk a. He’ng bakah hian nimin khan Bualpui ‘V’ leh Mualṭhuam ‘N’-a in sak ṭanpui ngaite ṭanpui nan ₹ 1,25,000/- (cheng nuai khat sing hnih leh sang nga) a sem chhuak bawk. Tun lai hian Lunglei khawpui chhungah tui a harsain, hei hian mipui nunphung pawh a tikhaihlak nasa hle a. Pu V. Malsawmtluanga chuan he harsatna hi hriain, a bial Lunglei khawpui chhunga chhungkaw harsa zualte hnenah a thlawnin tui a sem a. Zohnuai aṭanga bul ṭanin, vawiin khan chhungkaw 70 chuang hnenah a sem a. Tuikhur tui kang nghakte chawi turin Serkawn Meltea Pu C. Thangzuala Tui-ah tui a dah khahsak bawk a. Tun ṭhal chhung chu a mamawhte hnenah a tahtawlin tui hi sem zel a tum thu a sawi.
Pu V. Malsawmtluanga hi Lunglei Municipal Council (LMC)-a Executive Councillor Pi Lalhruaitluangi Sailo leh Local Council member-te leh ZPM Unit hruaitute’n an ṭawiawm a ni.
