Lunglei District Administration hma laknaa Lunglei District-a vohbikte chawi kanna tur ruahmanna – Project LEAP (Lunglei’s Empowerment for Access and Equity for all Persons) hnuaiah vawiin khan Lunglei Home TNT-ah TNT leh Ṭhualṭhu bial chhunga vohbikte hriselna dinhmun endikna, health assessment camp buatsaih a ni.
He hunah hian Sub-Deputy Commissioner Pi Lalnunchhani Hnamte hovin Project LEAP leh Healthy Lunglei District Campaign team te’n TNT hmunah kal chilhin camp hi an buatsaih a. Civil Hospital Lunglei aṭangin Dr Joseph Lalrindika Chawngthu, Sr Speciallist (Ortho); Dr Jimmy Lalnunpuia, Sr Medical Officer (ENT); Pi Rachel Malsawmkimi, Audiologist; Pu Challiandinga, Clinical Psychologist leh Pi Lalrempuii, Opthalmic Assistant te chuan he camp pantute hi an endik a. Vohbik mi 54 inentirin, an vai hian Unique Disability Identity (UDID) card nei thei tura nemngheh (certify) an ni a. UDID portal kal tlangin UDID card siamsak tura buaipui nghal a ni a. Ṭhualṭhu leh Bualte aṭanga kal vohbikte chu an veivahna senso tumsak an ni bawk.
He hunah hian Healthy Lunglei District Campaign hnuaiah medical team-te’n natna inkai chhawn theih loh (non-communicable disease) – zunthlum leh thisensang endikna, screening an buatsaih nghal bawk a. NCD screening-ah hian mi 76 endik niin, thisensang hriat chhuah thar 9 leh hriat sa endik nawn 3 leh zunthlum hriat chhuah thar 2 leh hriat sa endik nawn 1 an awm a ni.
