Vawiin khan Lunglei District Additional Deputy Commissioner (G) Pu James Miahlung hovin a pindan chhungah Mizoram Health System Strengthening Project (MHSSP) puihbawmna hnuaia Lunglei District chhunga thingtlang khua (rural area)-a natna inkai chhawn theih loh [Non Communicable Disease (NCD)] chungchang inzirtirna leh hri danna pek (routine immunisation) kaih kawpa kalpui dan tur ruahmanna sawi ho a ni. He hunah hian Lungleia health & family welfare department official-te, Election Officer, DIPRO leh SDC te an tel a. Tlabung, Lungsen leh Bunghmun aṭangin BDO leh medical officer te’n online-in an chhim bawk.
Lunglei District Immunisation Officer Dr Christina Zonunmawii’n Tlabung, Lungsen leh Bunghmun Block huam chhung khaw hrang hranga hri danna pek leh NCD chungchang inzirtirna leh endikna kalpui dan tur ruahmanna duan sa a sawi fiah a. Tluang tak leh hlawhtling taka hma lakna kalpui a nih theih dan tur rawtna hrang hrang sawi ho zui a ni.
Healthy Lunglei District Campaign hnuaiah NCD chungchang inzirtirna leh hriselna endikna hi June ni 12, 2024 aṭang khan kalpui ṭan niin, Lunglei khawpui chhungah sawrkar pisa, kohhran ṭhalai, tlawmngai pawl leh pawl hrang hrang hnenah NCD chungchang zirtirna leh hriselna endikna hi kalpui tawh a ni a. District chhung thingtlang khua tuam chhuak turin MHSSP aṭanga puihbawmna sum hmuh hmangin hunbi neia hri danna pek kalpui ṭhin (routine immunisation) nen kai kawpa hma lakna kalpui turin ruahmanna siam a ni a. November thla chawlhkar hnihna aṭangin thingtlang lama special NCD campaign hi kalpui ṭan tura ruahman a ni.
