Vawiin khan Lunglei District Bawrhsap Pi Navneet Mann ruahmanna leh hma laknaa Lunglei khawpui chhunga zirlai naupangte’n Bawrhsap hna thawh dan a taka an hriatna tur leh mawhphurhna pawimawh la ngam tura fuih phurtu atana ruahman, “Ni khat atan Bawrhsap (Be Deputy Commissioner for a Day)” tih kalpui dan tur sawi ho a ni. Bawrhsap Pi Navneet Mann kaihhruaia a hna thawh pindana ṭhut khawm buatsaihah hian DC officer-te bakah, Education leh I&PR official-te, District MJA hruaitute leh Zonet JB Lungleia thawktute an tel a. August ni 27, 2025 (Nilaini)-a Lunglei District Bawrhsap pisaa “Be DC for a Day” hun hman dan tur ruahmanna thlir hovin, thil ṭul hrang hrang an sawi ho.
Bawrhsap Pi Navneet Mann chuan he hma lakna hi Nasha Mukt Bharat Abhiyaan hnuaia hma lakna peng khat atana ruahman a nih thu sawiin, ruihhlo hman khawlohna laka zirlaite ven himna tura kalpui a nih thu a sawi a. He hma lakna kal tlang hian zirlaite chuan DC office hna thawh dan leh ni tina DC-in hun a hman dan te, department hrang hrang leh mipuite nena an indawr dan te an hriat theih dawn thu sawiin, hei hi an hma hun atana tum ruhna leh phurna petu atan leh an tum hlen tura ruihhlo laka fihlim a pawimawhzia an zir chhuahna atan tawn hriat pawimawh tak a nih beisei a ni, a ti.
He hma lakna atan hian Lunglei khawpui chhunga pawl 9 aṭanga pawl 12 zirlai naupang paruk thlan chhuah an ni a. Ruahman lawk dan chuan, August ni 27, 2025 (Nilaini) zing dar 9-ah Bawrhsap lirthei hmangin zirlai thlan chhuah 6 te hian Bawrhsap pisa thlengin, Bawrhsap hna thawh dan hrang hrang hrilhfiah an ni ang a. Chumi hnuah pindan hrang hrang fang kualin, thawktute nen an inkawm ang a. Department hrang hrangte’n an hna thawh dan DC-a an report leh DC dawrtu mipuite mamawh ngaithlain, thu thar theh darhtute nena inkawm hona hun an hman bakah, hmasawnna hna thawh kal mek a hmunah an tlawh bawk ang a. He’ng hun buatsaih hrang hrangah hian zirlaite hian Bawrhsap angin official-te, mipui leh journalist-te hi an hmachhawn dawn a ni.
