India rama district thlan bik ṭhenkhata zenghri danna (polio vaccine) pek runpui, Sub-National Immunisation Day (SNID) hman tura ruahman chu vawiin khan Lunglei District-ah pawh hman niin, District chhunga khaw 157-a vaccination booth 199-ah leh transit camp 3-ah te naupang kum 5 hnuai lamte hnenah zenghri danna pek a ni.
Lunglei Venglai Anganwadi Centre-I-a hun buatsaihah Lunglei District Bawrhsap Pi Navneet Mann chuan Lunglei District-a SNID kalpui tur hi a hawng a. India ram aṭangin zenghri (polio) chu um bo ni tawh mah se, ram ṭhenawm aṭanga kai chhawn theih a la nih avangin naupangte zenghri laka an him theih nan zenghri danna pek chu ngaih pawimawh a la ṭul reng tih a sawi a. Ni thum chhunga zenghri danna pek runpui kalpui tur chu hlawhtling taka kalpui a nih theih nan department leh tlawmngai pawlte thawh hona leh mipui thawhpuina a pawimawh thu sawiin, District chhunga naupang kum 5 hnuai lamte’n hri danna an lak kim vek theih nana theih tawp chhuah turin thawktute a chah.
He hun hi Lunglei District Immunisation Officer Dr Christina Zonunmawii chuan kaihruaiin, SNID hman chhan leh a pawimawhna bakah, Lunglei District-a SNID kalpui dan tur ruahmanna te a sawi a. Bawrhsap Pi Navneet Mann leh official-te chuan naupang kum 5 hnuai lam kal khawmte chu zenghri danna kaa thlawr chi (oral polio vaccine) far hnih zel pein, zenghri danna late hi an kut vei lam zungteah chhinchhiah zel an ni a. Lunglei Child Development Project Officer Pi R. Lalhmingliani’n lawm thu sawiin hun a khar.
Kumina India ram puma SNID kalpui turah hian Mizorama health district pali – Champhai (Champhai leh Khawzawl district), Lunglei (Lunglei leh Hnahthial district), Lawngtlai leh Siaha district-te thlan a ni a. SNID kalpui chhung hian naupang kum 5 hnuai lam, October ni 14, 2020 hnu lama piang chinte chu zenghri danna kaa thlawr chi (oral polio vaccine – OPV) far hnih ṭheuh pek vek tum a ni.
Lunglei District-a SNID kalpui turah hian zenghri danna pek tur naupang 12,028 tinzawn an ni a. Vawiin khan Lunglei District-a khaw 157-a hri danna pekna tur hmun (vaccination booth) 199 leh transit point 3 buatsaihah hri danna pek runpui hi buatsaih niin, tlai dar 3 thlenga hriat theih chinah naupang 5,406 chu hri danna hi pek an ni a. District target 12,028 aṭangin 44.9% niin, khaw tam zawk aṭangin report hi a la lut kim rih lo va. Vawiina pek hman lohte chu October ni 15 leh ni 16-ah te hriselna lama thawktu – health & wellness officer, health worker, ASHA leh Anganwadi worker-te’n in tina kal chilha zawng chhuakin, hri danna hi an pek chhunzawm ang.
