Nikumah khan Lunglei district-ah sikserh (malaria) natna avangin mi 3 an thi. Lunglei District Vector Borne Disease Control Programme (LDVBDCP) official-te’n an sawi danin nikum chhung khan Lunglei district-ah mi 51,058 thisen an endik atangin, Malaria hrik pai mi 4,959 hmuhchhuah an ni a, heng zinga mi 3 in nunna an chan a ni. Malaria hrik pai hmuhchhuah zinga 3,673 te hi PF hrik pai leh PV hrik pai 1,286 an ni.
Kum 2022 chhung khan Malaria hri kai mi 2,890 an awm a, nikum 2023 chhung khan Malaria hri kai hi a let deuh thawhin an pung a ni. Malaria hrikaite zingah hian Lunglei district khawthlang lam mi leh NHIDCL hnuaia NH54 leh NH302 kawng sial hnathawk labourer te an tam thu tarlan a ni a. Lunglei District-ah nikum chhung khan Chikungunya hri kai mi 43 leh Dengue hri kai mi 179 an hmuchhuak bawk.
Lunglei District-ah hian fur laia lirthei thlen theih lohna, lawng (Boat) chauhva kalpawh thei thingtlang khaw 30 vel a awm a. District Bawrhsap hmalaknain Disaster Management & Rehabilitation Dept. hnuai atangin mi 12 chuan theina Lawng siamtir mek a ni a, tunah peihfel thawhkhat tawh a ni. Hei hi a tulna piangah Health Dept. pawhin an hman ve theih tur thu tarlan a ni bawk.
