India ram puma furpui thlai chin hun (Kharif season) lo thleng tur atana inbuatsaih nana kut hna thawktute an khuaa kal chilh runpui, Viksit Krishi Sankalp Abhiyan (VKSA) kalpui mek chu vawiin khan a ni hnih nan Lunglei District chhungah kalpui chhunzawm a ni a, Agriculture, Horticulture, AH & Veterinary, Krishi Vigyan Kendra (KVK), Soil, Sericulture leh Fisheries official-te chu team thumah insiamin khua/veng pasarihah an feh chhuak a ni.
VKSA Team feh chhuakte hian Zohnuai, South Khawlek, Phairuangkai, Serkawn, Buarpui, Hauruang leh Zotlang te tlawhin, kut hna thawktu mi 1,046 (mipa 700 leh hmeichhia 346) te nen hun an hmang ho va. Thlai chin, ran vulh, sangha leh pangang khawi leh kut hna thawh kaihhnawiha hriat tur pawimawh hrang hrangte zirtirin, thlai chi ṭha leh tun lai thiamna hman ṭangkai dan te, thlai leh ran natna enkawl dan te, lei ṭha hman dan leh sawrkarin kut hna thawktute tana hamṭhatna a duan hrang hrangte an zirtir a. Kut hna thawktute’n an hriat duh hrang hrangte hrilhfiahin, hun hlawk tak hman ho a ni.
VKSA campaign hi India ram pumah May ni 29, 2025 khan kalpui ṭan niin, Lunglei District-ah chuan nimin aṭang khan kalpui ṭan a ni a. Niminah khaw 6 leh vawiinah khaw 7, a vaiin khaw 13-ah hun hman tawh a ni.
