District bawrhsap-in FIR a thehluh behchhanin Lunglei district Police te chuan halpuah leh a kaihhnawih Rs 9,000 hu vel an man. Krismas lawmna boruak a zo a, vawiin atang khan nun dan phung pangngai-in Lungleiah hun hman a ni a, Sorkar pisa pawh in hawngin Bank leh sumdawnna hrang hrang pawh an in hawng. Pisa kài erawh an tam lutuk lova, dawr inhawng bawk mahse mipui an tam lutuk lo. Halpuah ri hriat tur a awm loh bakah a hal man an awm lo. Hetihlai hian bawrhsap Pi Navneed Mann-i’n FIR a thehluh bawhzui-in Police te’n RVL Store Chanmari atangin halpuah leh halmawi Rs 9,000 hu vel an man a.
Dawr neitu hi BNS section 223(a) hmanga thubuai siamsak a ni a, thil awm dan chhuizui mek zel a ni. Hetih lai hian vawiin chawhma lam khan Lunglei district SP Pu Jerome Lalmuankima hovin a pisa-ah Lunglei khawpui chhunga Police Officer zawng zawngte kalkhawmin Krismas vuakveta an hnathawhte thlirletna hun an hmang a. Police Officer kal khawmte chuan an duty-na hmun theuh report pein Lunglei khawpui chhungah boruak duhawm lo leh harsatna thleng a awm loh thu an sawi a. SP chuan Police Officer kal khawmte hnenah kum hlui thlah zan leh kum thar inkarah pawh mipuite him zawk na’n khauh lehzualin tan la turin a fuih a.
Traffic Police-te pawh rui chunga lirthei khalh leh mi dang tana hlauhawm khawpa lirthei khalhtute lakah dan angin hma la turin a tih bakah; two wheeler silencer/exhaust ring lutuk hmangtute chungah pawh dan angin hma la turin a hrilh. Mipuite chu kum hlui thlah zanah halpuah leh halmawi hal lo turin a ngen a, sorkar thupek bawhchhia a hal luite chu an chungah dan angin hmalak a nih tur thu a sawi bawk a ni.
