Lok Sabha Speaker Om Birla chuan State hrang hrangin Assembly thutkhawm an neih chin tur bithliah zat dan anga awm sa chu an zawm tur a ni a ti a, Assembly neih zat tur a tlem ber anga duan zat tal zawm vek a pawimawh tih a sawi.
He thu hi vawiina Assembly Annex Committee Room-a thuthar thehdarhtute a kawmna ah sawiin Om Birla chuan State Assembly thutkhawm zat tura duan dan awmsa chu state tin ten an ngaih pawimawh a ngai a ti a, State tina Legislators te pawhin tunlai thiamna hman tangkaiin hmun dang te nen inpawh tlang taka awm theih nan hmang tangkai turin a duh a ti a, state tin ten midangte thiltha tih leh kalphung tha anlo neih zir nan tunlai thiamna chu state tina Assembly member ten hmang tangkai turin a duh tih a sawi.
Lok Sabha Speaker chuan Commonwealth Parliamentary Association thutkhawmah langtlang zawka State tina Assembly te hmalakna mipui hnena a thlen theih dan tur chungchang sawi ani dawn ati a, House tihdan phung leh kal hmang mipuite hriattur chu mi tinin an hriat theih nan hmalak ani dawn tih a sawi. Om Birla chuan Mizoramah leh hmarchhak state hrang hrangah hmasawn theihna hrang hrang a awm tih sawiin thlai chin leh kutkawih eizawnna bultan kawngah theihna hrang hrang a awm a ti a, thutkhawm chhungin state tinin inpawh takin hmasawnna chungchang an sawi dawn a ti bawk.
