Lok Sabha MP Pu C. Lalrosanga’n Sawrkar laipui scheme vilpui tur leh sawt zawk leh awmze nei zawka kalpui anih theih nan sawrkara hnathawktute bakah khawtlang mipuite an pawimawh a ti. He thu hi vawiina Lawngtlai DC Conference Hall-a District Development Co-ordination and Monitoring Committee thutkhawm a kaihhruaina ah sawiin Lok Sabha MP chuan thutkhawm an buatsaih chu Sawrkara thawktute bakah khawtlang leh tlawmngai pawl hruaitute ngaihdan ngaihthlakna hun pawimawh tak a nih thu a sawi a, sawrkar laipui scheme vil tur leh harsatna sawiho tura din District Development Co-ordination Committee chu a pawimawh thu sawiin awmze nei zawka kalpui a ngaih thu a sawi.
Pu C.Lalrosanga chuan DISHA thutkhawm hmasa a lo rel tawh angin Lawngtlai leh Siaha inkalpawhna tur a ‘Permanent Bridge over Tuipui Ferry’ sakna turin DPR ruahman a nih tawh thu tarlangin he lei hi metre 257.8 a sei leh metre 12.15 a zau tur a nih thu a sawi a. He hmalakna hi a hlawhtlin chuan Lawngtlai leh Siaha inkar kal hun chhung hi nasa tak a tih tlem a nih tur thu a sawi.
Vawiin Lawngtlai DISHA thutkhawmna ah hian kum 2023-24 chhung a Department 17 hnuai a Sawrkar laipui scheme kalpui dan thlirlet a ni a. hmasawnna hnathawh hrang hrang te chu chak zawka thawh anih theih nana hmalakna tur hrang hrang an sawiho a ni.
