Mizoram Pradesh Congress Committee chuan kumin Lok Sabha inthlanpui lo awm turah an party candidate turin Pu Lalbiakzama an puang.
MPCC President chuan vawiin khan an candidate tur hi puangin MNF nena Common candidate nei tura inbiakna a awm tawh a ti a, an neih leh loh chhan chu BJP bei tur ber an nih avang leh MNF in NEDA an thawhpuina an tih tawp theih loh vang anih thu a sawi.
Congress Candidate tur Pu Lalbiakzama hi a nupui Laldingliani nen fapa pathum leh fanu pakhat neiin Model veng, Aizawl-ah an cheng mek a, Kum 2012 June thlaah Home Department-ah Joint Secretary a post a ni a, Home Department-ah hian a pension thleng awmin Secretary thlenga kaisangin Mizoram Police Service atanga Home Secretary ni hmasa ber a ni.
Home Department-ah hian Mizoram nghawng hna khirhkhan leh harsa tak tak khawihin an hmachhawn a, heng zingah hian Mizoram Sorkar leh Tripura sorkar aiawhte nen Bru chungchanga inbiakna ah vawi eng emawzah Mizoram ai a awh a, Mizoram sorkar leh HPC ‘D’ te remna zawnga inbiaknaah Mizoram aiawh Team Leader niin hlawhtling takin inremna an ziahpui thei a, he mi zarah hian Sinlung Hills Council a lo piang ta a ni.
Lok Sabha inthlan lo awm turah hian Party thenkhat ten candidate puang tawhin Mizorama rorel lai ZPM chuan Richie Vanlalhmangaiha an ruat a, PC Party in Pi Rita Malsawmi ruatin Pu Lalhriatrenga Chhangte chu independent in a chuh dawn a, naktukah hian MNF ten an candidate tur an puang dawn a, BJP erawh central lamin an puang dawn niin state-a an thuneituten an sawi.
