Lok Sabha inthlanpui 2024 atana inpuahchahna kal mekah vawiin khan SVEEP Aizawl District buatsaihin mipui zinga inhrilhhriatna hun hmang pahin SVEEP concert chu Millennium Centre kawtah buatsaih a ni a. He hunah hian CEO Pu Madhup Vyas leh DEO Pi Nazuk Kumar te pawh an tel a ni.
Thu sawiin Pi Nazuk Kumar, District Election Officer, Aizawl bawrhsap ni bawk chuan rimawi chu Mizo hnam ziarang a bet tlat a nih thu sawiin vawiina inthlanpui chungchanga inhrilhriatna buatsaih chu zai mite nena hman ho a nih thu a sawi a. Inthlanpui a lo awm hian vote nei tawh phawt chuan vote an thlak ngei chu a pawimawh thu sawiin, tu vote pawh – mipa emaw hmeichhia emaw, kum upa an ni emaw naupang an ni emaw, a hlut dan a in an vek thu a sawiin, April ni 19 ah Mizoram aiawha Lok Sabha a thu tur thlang chhuak tura mipui che chhuak turin a sawm a ni.
SVEEP Nodal Officer Pi C. Laltleipuii chuan MLA inthlan neih zawh chiah takah Mizoram chhung district ngaihtuah in Aizawl district chu vote nei zawng zawng atanga chhiarin vote tla a that tawk loh thu a sawi a. Hemi a nih avang hian Aizawl District ah tan lak a ngaih thu a sawi.
He SVEEP concert-ah hian SVEEP hmalakna atana artist thawhpui hrang hrangte’n performance an nei a. SVEEP Asst. Nodal Officer Pu Lalhruaitluangi chuan lawmthu sawiin hun a khar a ni.
Ni thum chhung Art Workshop & Exhibition neih chu vawiin khan khar ni bawkin, CEO leh DEO te hian an tlawh bawk a ni.
