April ni 19-a Mizoram Lok Sabha bial inthlan vote thlak turah candidate 6-in an chuh dawn tih a chiang tawh a, mi 5 hi political party in an dintir an ni a, 1 chu independent a ni. Mizoram Lok Sabha bial chuh tur hian rorellai ZPM chuan Pu Richard Vanlalhmangaiha chu an party candidate a ni tih an puang tawh a. Kar kalta Zirtawpni khan chuh tumin Aizawl district DEO leh Returning Officer Pi Nazuk Kumar hnenah a nomination a thehlut tawh a. MNF candidate, Rajya Sabha member ni lai Pu K. Vanlalvena pawhin Nilaini khian nomination a thehlut dawn ni a thudawn a ni. Mizoram Pradesh Congress Committee (MPCC) chuan Lok Sabha inthlan chuh turin an party candidate atan MPS officer chawl ta, Mizoram Home Secretary atanga pension Pu Lalbiakzama chu an thlang a, ani pawh hian naktukah nomination thehluh a tum bawk a.
PC Party chuan an party candidate atan Pi Rita Malsawmi hming an puang tawh bawk a. Ani hi kum 1971 a Mizoramin Lok Sabha bial kan neih atanga MP chuhtu hmeichhia 3-na a ni. BJP chuan an state unit president Pu Vanlalhmuaka a din tur thu vawiin khan an puang bawk. Kum 2019 a independent a Lok Sabha MP chuh tawh mining engineer chawl tawh Pu Lalhriatrenga Chhangte chuan independent bawka tun tum Lok Sabha inthlanpui hi chuh a tum thu a sawi a. Naktuk hian nomination a thehluh dawn thu a sawi.
Hetih lai hian political party hrang hrang leh MP candidate te hian inthlan campaign an tan tawh a. MPCC chuan Ningani khian Lok Sabha inthlanpui lo awm tur atan campaign beihpui an thlak tan dawn a. Tun tum Lok Sabha Mizoram bial inthlanna tur atan hian Election Commission chuan March ni 20 khan hriattirna a tichhuak a. Khami ni atang khan nomination thehluh tan theih a ni a. Chuh tumte hming pekluh theih hun hi Nilaini khian a tawp ang a, a tuk Ningani-ah nomination lehkhate endik a ni ang. March ni 30 khi hming pelutte’n an nomination an hnuhdawh theihna ni hnuhnung ber a ni dawn a. April ni 19-ah vote thlakin June ni 4-ah vote tlate chhiar a ni dawn a ni.
