Thla thar April ni 19-a Lok Sabha inthlanpui vote thlak hunah vote tla a tam theih nana hmalak dan tur sawihona State Media Cell for Lok Sabha General Election, 2024 chuan vawiin khan DIPR Conference Hall, Lianchhiari Run-ah inrawnkhawmna hun a buatsaih a. Kohhran hrang hrang thalai hruaitute, Tlawmngai Pawl hrang hrang hruaitute, Mizo Zirlai Pawl hruaitute bakah hnam bil zirlai pawl hrang hrang aiawhte an tel. Inrawnkhawmna hun hi Mizoram Addl. Chief Electoral Officer, Dr. H. Lianzela’n a kaihruai a. Mizoramah chuan Lok Sabha MP thlanna aiin MLA thlannaah vote tla a tam sang fal hle thin tih sawiin, MLA thlannaah India rama vote thlak tha ber te zinga mi a nih laiin a hnu lawk thla 4 vel leka Lok Sabha MP thlanah ram puma vote tla chawhrual Mizoramin a pha thei ngai meuh lo va, mipuite a bikin thalaite zingah vote tla a that lehzual theih nan mi tin tanho a tul a, hemi tur hian eng tiangin nge hma lakho a thawhho a nih theih ang tih sawihona hun an ruahman tih a sawi a ni.
He hunah hian Deputy Chief Electoral Officer Pu Henry C. Lalrawnkima leh Addl SP (Crime), Pu Zonun Sanga ten inthlanpui neih tawha Mizoram dinhmun tlangpui leh Dan leh hrai zawm tur pawimawhte an sawifiah a. Hemi hnu hian Addl. CEO kaihhruaina hnuaiah sawiho a ni a; rawtna leh ngaihdan pawimawh tak tak te sawiho a ni a, sawihona êng atang hian hmalakna thar duan tum a ni.
Vawiin sawihona hunah hian Mizoram Upa Pawl, Central YMA, Central KTP, Mizoram Thalai Kristian Pawl, Salvation Army Youth, North-East PYD, Mizoram PYD, Adventist Youth Ministries (SDA), Diocese Catholic Thalai Pawl, Mizo Zirlai Pawl, Siamsinpawlpi (Paite Zirlai Pawl), Hmar Students Association, Mizoram Bawm Students Association, Lai Students Association, Mara Students Organisation, Pang Zirlai Pawl, Central Young Chakma Association leh Bru Students Association aiawhte an tel.
