Mizoram Lok Sabha bial inthlan chuh tur zingah Mizoram Police Service (MPS) hlui, Home Secretary a nih lai a a hna a chawl ta Congress candidate Pu Lalbiakzama hian nomination a thehluh rual a affidavit a thehluh telah chuan a sum fai neih, khawih chet theih thil cheng vaibelchhe 1 a hlu a neih laiin khawih chet theih loh thil cheng vaibelchhe 2 leh nuai 80 a nei a. Khawih chet theih loh ro a neih hi agriculture a siam chi ram pakhat leh agricutlure atana siam chi ni lo ram 2 a ni. A nupuiin khawih chet theih thil cheng 4,790 hu a nei a, a chhungkaw midangte’n khawih chet theih thil an neih belhkhawm chu a hlut zawng cheng nuai 7, sing 4 leh sang 1 a ni.
Candidate 6 zinga 4 hi an thil neih zawng zawng belhkhawm cheng vaibelchhe khat chuang (crorepati) an ni hlawm a. A rethei ber chu BJP candidate Pu Vanlalhmuaka a ni a, thil khawih chet theih cheng nuai 11 leh sing 3 a nei a ni. Hausa ber dawttu chu independent candidate Lalhriatrenga Chhangte a ni a. A nupui ram neih hlut zawng nena chhut chuan a thil neih zawng zawng hlut zawng hi cheng vaibelchhe 2 leh nuai 7 chuang a ni.
A pathumna chu Rajya Sabha MP ni lai MNF candidate Pu K. Vanlalvena a ni a. Lak sawn theih loh thil cheng nuai 58 sing 3 leh sang 6 hu a neih laiin lak sawn theih loh ro cheng vaibelchhe 1 leh nuai 24 hu a nei a ni. ZPM candidate Richard Vanlalhmangaiha chu palina ni-in lak sawn theih thil cheng nuai 97 sing 7 leh sang 4 a neih bakah laksawn theih loh ro cheng nuai 70 a nei a, a belhkhawm chu cheng vaibelchhe 1 leh nuai 67 a ni. Hmeichhe candidate awm chhun Pi Rita Malsawmi (MPC) chuan cheng laksawn theih chi cheng nuai 16 leh sing 6 a nei a ni.
