Vawiin khan Akashvani Lunglei leh Government J. Buana College, Lunglei ṭang dunin chhim lam ṭhalaite fuih phurna atana Govt J. Buana College Multipurpose Hall-a Memorial & Motivational Lecture cum Concert for Youth an buatsaih chu Lunglei Municipal Council (LMC) Vice Chairman Pu K. Lalrinawma chuan Khuallian niin a hmanpui.
Khuallian Pu K. Lalrinawma chuan ram hmasawnna chu ṭhalaite’n an vei a ṭul thu sawiin, Lunglei khawpui bakah, District chhung leh Mizoram hmasawnna tur te, agriculture lama thar chhuah hlawkna tur leh ei leh bara hmasawnna tur te ngaih pawimawh a ṭul thu a sawi a. Lunglei khaw chhung kawng siam mek te, Pialthleng leh Tlawng aṭanga Lunglei tui lakna tihchangtlun mek te, Lungleia Mizoram State University dah tur leh sawrkarin khawtlang hmasawnna tura hma lakna a neih hrang hrangah ṭhalaite’n sawrkar ṭawiawm leh thawhpui bakah, ṭangkai taka hmang tura inbuatsaih a pawimawh thu a sawi a. Ṭhalai mipate chu chhungkua leh khawtlang innghahna tlak ni tur leh hmeichhiate chu hmeichhe ṭha, chhungkaw tana nghet taka ding tlat mi ni tura chahin, ṭhalaite chu hnam leh chhungkaw innghahna tlak ni tura danglam ngam turin a chah.
Akashvani Lungleia Programme Executive & Head of Programme Pu Lawmliana Tochhawng chuan inlawmna thu sawiin, Govt J. Buana College Principal Pi Lalthangmawii Chhangte chuan “Padma Shri J. Buana chanchin leh hnathawh” tih thupui hmangin thu a sawi a. IIT Gandhinagar-a Assistant Professor Dr Krista Roluahpuia chuan “Ṭhalaite tana hmathlir: Chhim Ṭhalaite tho ang u” tih thupui hmangin thu a sawi bawk a. Malzai hrang hrang leh Cassettes band te concert ngaihthlak leh thlir ho a ni a. Akashvani Lungleia Sr Announcer Pi PC Lalmuanawmi’n lawm thu sawiin hun a khar.
