Vawiin aṭang khan Lunglei Municipal Council (LMC) huam chhunga bawlhhlawh ṭawih thei lo paih zinga plastic lam chi awm zat leh a chi hrang dinhmun endikna leh zir chianna kalpui a ni.
LMC huam chhunga bawlhhlawh paih zir chianna leh endik hna hi Executive Councillor pahnih, Pu Zorinsanga Hmar leh Pi Lalhruaitluangi Sailo te uapna hnuaiah LMC Secretary Pu Lalrinawma hovin kalpui a ni a. Riangvaite Thlanmuala Lunglei khawpui bawlhhlawh paihna hmunah kal chilhin, LMC huam chhunga bawlhhlawh ṭawih thei lo paih zingah plastic eng zat nge awm tih leh eng plastic ang chi nge hman a nih tih enfiah a ni a. He zir chianna hi July ni 29, 2024 thleng kalpui tura ruahman a ni.
Kum tina plastic waste annual report theh luh ṭhin chu zir chianna mumal a awm lo ṭhin nia a lan bakah, vawi khat lek hman chi sarang (single use plastic) ṭhenkhat hman khap a nih tak bawk avangin Ministry of Environment, Forests and Climate Change chuan Solid Waste Management Rules a siam ṭha a. He dan thar kalpui tur hian Central Pollution Control Board chuan Standard Operating Procedure (SOP) duangin, Mizoramah pawh kalpui a ni a. He SOP zulzui hian tunah hian Urban Local Body pahnih (Aizawl Municipal Corporation & Lunglei Municipal Council) leh Village Council/Gram Panchayat thlan bikahte bawlhhlawh aṭanga plastic hman dan endikna hi kalpui mek a ni.
