Inrinni zan dar 11 vel khan Bilkhawthlir Kuhva Chingtu Cooperative Society (BKCCS) Pvt Ltd hruaitute duty chuan Bilkhawthlir Chemphai ram Buarchep zau ah Myanmar Kuhva ro phurtu lirthei pathum, an kuhva ro phurh leh a phurtute hrengin Police kutah an hlan.
Kuhva phurhna atana hman TATA Yodha te hi MZ-05B/0973 leh a khalhtu- Stanish-a State Veng, Vairengte; MZ-05 B/1385, a khalhtu- Lalchhanhima IOC Veng, Vairengte leh MZ-05A/7766, a khalhtu- Jerry Lallianmawia IOC Veng, Vairengte leh heng Kuhva phurtu lirthei te viltu (Escort-tu) ni a rinhelh Swift Car pakhat- MZ-05B/0636 leh a neitu Abraham Lalrinthanga Phainuam te an man a, lirthei pathum in an phurh Kuhva ro bag 79 chu Bilkhawthlir Police kutah an hlan nghal a ni.
Bilkhawthlir Kuhva Chingtu Cooperative Society chuan dan lova Kuhva hmanga sumdawng tawh lo turin mipuite an ngen nawn leh a. Lirthei lian neitute pawh dan phal loh kuhva phur tawh lo turin an ngen bawk. An ngenna in awmzia a nei lova, an ngenna ngai pawimawh lova an tilui zel a nih chuan thil duhawmlo leh harsatna lian zawk a thleng palh a nih pawhin Bilkhawthlir Kuhva chingtute chuan mawh an phurh loh tur thu an sawi a ni.
