Chief Minister leh GAD changtu Pu Lalduhoma’n Lengpui Airport ram huam chhungah mimal ram nei an tam tih a sawi. He thu hi vawiina Assembly thutkhawmah sawiin Pu Lalduhoma chuan Lengpui Airport chu midang kutah hlan dawn chuan a ram chin buai tam tak a awm a ti a, Mi thil ti thei tak tak te zingah LSC nei an awm tih sawiin heng hi Revenue Department-in a rang thei berin survey turin hma a la dawn a ti a, an zawh veleh an hung dawn tih sawiin GAD lamin a hung hna an buaipui dawn tih a sawi.
Chief Minister chuan Lengpui Airport midang kuta hlan a nih dawn chuan a ram chin chian a tul thu sawin an hung dawn chuan khingtu pawh an ngah viau thei a ti a, Dik lo taka ram inpekna a awm thin avangin inhlanchhawn lehzelna turah buaina tam tak a awm phah tih a sawi. Chief Minister chuan sorkar tharah Lengpui Airport chu bungraw phur service theihna turin a hranpa-a ruahmanna a la awm rih lo a ti a, enzui vat tum ani tih sawiin bungraw phur thlawhna an ngaipawimawh a, an policy-ah pawh an telh a ti a, Thlai tharte thlawhna hmanga thawn chhuah theih dan an zawng tih sawiin Sorkar hmasa pawhin a ngaipawimawh a ti a, hmalakna tam tak hmuh tur a awm thu a sawi.
Chief Minister chuan Airport ah sum hman leh lut uluk taka ngaihtuah a ngai a ti a, sum lut mahse sum sen tawh atanga chhutin hloh a nasa tih sawiin leiba delh beh reng sorkar tan chuan enkawl a harsa a ti a, zirchiang tur committee din ten May 3-a an thehluh dan a zirin ngaihdan an siam dawn a ti a, Airport Authority of India emaw mimal kutah emaw hlanchhawn an tum dawn tih a sawi bawk.
