Lengpui Airport-a thlawhna tlan kawng a that tawkloh avangin Central Road Research Institute chuan thla 3 hnuah Licence tihtawp sak theih a ni an ti a, hemi bawhzui hian Mizoram sawrkar chuan Lengpui Airport thlawhna tlan kawng siamthatna tur cheng vbch 80 a ruahman.
MNF Legislature Party leh Lengpui Airport hotute inkawmna ah he thu hi tarlan niin Aviation hotute chuan thlawhna tlan kawng chu a that tawk loh thu Central Road Research Institute chuan an sawi a ti a, CRRI hotuten Lengpui Airport enkawltute hnenah thlawhna tlan kawng chu siam that anih loh chuan License cancel thlengin hmalak theih anih thu an sawi a, hemi avang hian Mizoram sawrkar chuan February ni 5 khan Lengpui thlawhna tlan kawng siamthat nan hian cheng vbch 80 a ruahman a ni.
Lengpui Airport hotute sawi danin tun dinhmunah thlawhna tlan kawng chu a that zawng tehna PCN 36 a ni mek a, hei hi PCN 55 ah tih san tum ani tih sawiin hmalakna an kalpui tan thu an sawi a, CRRI hotute sawi danah tuna Airport runway chu thlawhna chetsual hlauhthawnawm anih avang leh mipui tan a him tawkloa an ngaih avangin siam that ngai an ti a, hemi avang hian Mizoram sawrkar chuan siamthatna tur atan cheng vbch 80 a ruahman a ni.
Lengpui Airport hotute sawi danin Lengpui ram huam chin chu teh thin a ni an ti a, kum 2022-a a zau zawng teh ah Airport ram bigha 1997-a zau chu kum 2024-a teh hnuhnun berah bigha 1724.78 anih thu an sawi bawk.
