Vawiin chawhnu khan Pi Lalrinpuii, Social Welfare Minister chuan Lawngtlai-a Lairam Rescue Centre Main Building chu khuallian niin a hawng. Pi Lalrinpuii chuan Lairam Rescue Centre Main Building chu ruihhlo ngai, a duh leh mamawh apiangten rilru leh taksa lama siamtharna an chan theih nan leh tangkai taka an hman theihna turin lawm takin a hawng tih a sawi a. Sawrkarin ruihhlo do a ngaipawimawh em em a, mimal leh pawl ruihhlo do thinte chu sawrkarin a thlawp tlat a ni, a ti. Ruihhlo do turin sawrkarin State leh District level-ah commitee hrang hrangte a din a, chutih rualin sawrkar tan do hneh a harsaa, NGO leh Kohhran te thawhpuina a tul tak zet a; thawhhona tha tak i nei zel ang u tiin a sawm a ni. Mizoramah ruihhlo bawiha tang tam tak awmin nunna hlutak chan a ni fo chu a run thlak hle tih sawiin Pi Lalrinpuii chuan mipuite thangharh a hun tawh tak zet a ni, a ti.
Social Welfare Minister chuan ruihhlo do kawngah inzirtirna (awareness) mumal leh uar zawka kalpui a tul hle a ti a. Kohhran ten program an neihna hrang hrangah ruihhlo ti lo tura inzirtirna uar zawka kalpui turin a ngen a. Mizoramah chuan mitin kan inpawhin thianho nena inkawmkhawm ngaina mi kan ni a, heihi mi tam takin ruihhlo tih tan nan an hmang chawk tih tarlangin fimkhur a tul hle a ti. Myanmar atanga kan unaute lo chhuk thenkhat ten ruihhlo an tawlh thin a, a pawi hle a ni tiin chutiang tih ching man chhuah kawngah sawrkar puihtu ni turin Lairam mipuite a sawm a ni.
Ruihhlo laka fihlim turin Chhungkua a pawimawh ber nia a hriat thu sawiin Pi Lalrinpuii chuan chhungkuaah bul i tan thar leh ang u tiin kalkhawmte a sawm a. In chhungkhurah nu chauhin hma a la thei lo a, pa ber nen tan tlan a ngai tiin chhungkaw tinah nu leh paten tha i thawh thar leh u a ti. ‘A bul tan that chu a zahve zo’ tih a nih angin chhungkua-ah bul tan thar leh a tul a ni, a ti a. Tun dinhmunah Lairam Rescue Centre- ah tui a hnianghnar tawk lo hle tih chu a hriatthiampui tih tarlangin a theihna zawnah theihtawp a chhuahpui tur thu a sawi.
Khuallian chuan Social Welfare Deparment leh Ruihhlo ngai enkawlna In te thawhho a tul hle tih tarlangin, Lairam Rescue Centre chu thawhpuiah a sawm a. Mizorama ruihhlo ngai enkawlna hmun atangin mi thahnem tak enkawl dam niin, mi tha tak takah chherchhuah an ni fo tih sawiin Minister chuan Lairam Rescue Centre pawhin taksa leh rilru damna nen mi tam tak an enkawl chhuah a beisei tlat tih sawiin hmalam hunah duhsakna a hlan nghal a ni.
Lairam Rescue Centre Main Building hawnna inkhawm hi Revd. Dr. L.H. Lalpekhlua, AGS i/C Service, LIKBK chuan kaihruaiin kalkhawmte lawmna thu a sawi nghal a. Revd. Lianchhunga, Home Superintendent, Lairam Rescue Centre chuan lawmthu sawina neiin hun a khar. Vawiina hawn tak Lairam Rescue Centre Main building hi ‘Upa C. Ngunkianchunga & Rvt. KR. Chhingpuii Building tih a ni a. Tun dinhmunah Lairam Rescue Centre-ah hian Superintendent pakhat leh thawktu dang 10 awmin ruihhlo ngai enkawl lai mi 12 an nei mek a ni.
