Nimin khan Lawngtlai Block huam chhunga school-te tan District Project Office, Samagra Shiksha, Lawngtlai District buatsaihin Chandmary Inpui, Lawngtlaiah School Management Committee (SMC)/School Management & Development Committee (SMDC) training neih a ni. He training-ah hian SMC/SMDC Chairman leh Secretary 70 chuang an tel a. Samagra Shiksha Lawngtlaia Deputy District Project Coordinator Pu Alex Lalzawmpuia chuan hun kaihruaiin, District Education Officer & DPC Pi K. Lalsiamliani chuan training hi a hawng a ni.
Chawhma lamah Pu Zionparlawma, Deputy State Project Director, Samagra Shiksha, Mizoram, Aizawl chu resource person niin, Vidyanjali chungchang leh school-te’n hma an lak zel dan tur powerpoint presentation hmanga tar langin training a pe a. Chawhnu lamah Pi N. Vanhlamawii, APO chu resource person niin, SMC/SMDC, NIPUN Bharat, Shaala Siddhi, Vocational Education chungchang training a pe thung a. Pu William Sailo, AAO chuan PFMS training pe bawkin, Additional DPC Pu H. Lalṭanpuia’n lawm thu sawiin training hi a khar a ni.
Sangau Block huam chhunga SMC/SMDC leh NGO Sub-Headquarters te tan May ni 2, 2024 (Ningani)-ah leh Bungtlang South Block tan May ni 7, 2024 (Thawhlehni)-ah te training hi buatsaih ve leh tura ruahman a ni.
